இரத்தம் அறிவோம்...! Know about Blood

இரத்தம் அறிவோம்...!

பள்ளியில் மிகவும் விரும்பிப் படித்த உயிரியல் பாடத்தில் இன்னும் மறந்திடாத சில பகுதிகளையும் - நான் கல்லூரியின் போது, எங்கள் கல்லூரியின் இரத்த தான சங்கத்தில் செயலாற்றிய போதும் - சிலரின் அவசரத் தேவைக்கு இரத்ததானம் செய்த போதும் - நான் கற்ற சில விஷயங்களைப் பகிர்கிறேன்...

பொதுவாக, நமக்குச் சில சந்தேகங்கள் எழக்கூடும்... எவ்விதம் நம் இரத்தம் வகைப்படுத்தப் படுகிறது? இரத்த வகைக்குப் பின்னேக் கூறப்படும் +ve மற்றும் -veக்கு என்ன அர்த்தம்? யாருக்கு யார் இரத்தம் கொடுக்கலாம்? இந்த இரத்த வகைகள் கண்டறிந்தது யார்? யார் universal donor? யார் universal acceptor? இரத்தம் கொடுத்தால் நம் உடலில் இரத்தம் குறையுமா? கேள்விகள் போதும்.... விடைகளைத் தேடுவோம்...

இரத்தம் பரிமாற்றலின் வரலாறு:

17 ஆம் நூற்றாண்டுகளின் இறுதியில் இருந்தே இந்த இரத்தப் பரிமாற்றம் பற்றிய ஆய்வுகள் - ஆராய்சிகள் துவங்கி விட்டன. முதலில், சில விலங்குகளின் இரத்தம் கொண்டு துவங்கிய இந்த ஆராய்ச்சி சில மதங்களின் கட்டுப்பாடு காரணம், ஆராய்ச்சிகள் இடையில் தொய்வடைந்தது. ஆங்காங்கே, அரச குடும்பத்தினருக்கு மட்டும் இரத்தப் பரிமாற்றங்கள் நடத்தப் பரிமாற்றங்கள் நடந்து கொண்டிருந்தாலும், அதன் முழுப்பயன் அனைவரும் அடையமுடியாமல் இருந்தது. பல நேரங்களில், இரத்த பரிமாற்றம் தோல்வி அடைந்ததுடன், உயிர்சேதமும் விளைந்தது. இந்நிலையில், 1901 ஆம் வருடம் கார்ல் லான்ஸ்டெயினர் என்பவர் கண்டறிந்தது தான் நாம் இன்று பின்பற்றும் இரத்த வகை அறியும் முறை. இவரே, இரத்த வகை அறியாமல் இரத்த பரிமாற்றம் செய்தால் உயிர் போகும் அளவுக்கு ஆபத்து உண்டு என்பதையும், அதிலிருந்து மீள பின்பற்ற வேண்டிய யுத்திகளையும் உலகுக்கு உரைத்தார். 

இரத்த வகைகள்:

இரத்த வகைகள் என்ன என்பது அனைவருக்கும் தெரிந்ததே. 

• A வகை 
• B வகை
• AB வகை
• O வகை 

நமது இரத்தத்தில் பிளாஸ்மா, சிவப்பணு, வெள்ளையணு, இரத்தத்தட்டுக்கள் இவற்றுடன் சில ஆன்டிஜென் (antigen), சில ஆன்டிபாடி (antibody) இவைகளும் இருக்கின்றன. இவற்றின் அடிப்படையில் நம் இரத்தம் வகைப்படுத்தப் படுகிறது. எந்த வகை ஆன்டிஜென் நம் இரத்தத்தில் இருக்கிறதோ, அதுவே நமது இரத்த வகையாகும். A வகை ஆன்டிஜென் இருந்தால் A வகை இரத்தம். B வகை ஆன்டிஜென் இருந்தால் B வகை இரத்தம். இரண்டும் இருந்தால் AB வகை இரத்தம். இரண்டும் இல்லையெனில், O வகை இரத்தம். 

எந்த வகை ஆன்டிஜென் நம் ரத்தத்தில் உள்ளதோ, அதன் எதிர் வகை ஆன்டிபாடி நம் ரத்தத்தில் இருக்கும். ஒரே வகை ஆன்டிஜென் மற்றும் ஆன்டிபாடி கலந்தால் ஒன்றோடு ஒன்று ஒட்டிக்கொண்டு இரத்தத்தை உறையச் செய்து இரத்த ஓட்டத்தை நிறுத்தி விடும். இதனால்தான் இரத்தவகை அறிந்து பரிமாற்றம் செய்வது அவசியமாகிறது.

Rh காரணி:

இரத்த வகைகள் பற்றி அறிந்தோம். நமது இரத்த வகை குறிப்பிடும் போது வகைக்குப் பின்னர் + அல்லது - என்றிருக்கக் காணலாம். இதற்கு Rh காரணி (Rh Factor) என்று பெயர். தெற்காசியா மற்றும் இந்தியக் காடுகளில் வாழும் ரீசஸ் வகைக் குரங்குகளின் இரத்தத்தில் காணப்படும் ஒரு புரதப்பொருள் நம் இரத்தத்திலும் காணப்படுகிறது. இது நம் இரத்தத்தில் இருந்தால் Rh +ve, இல்லையெனில் Rh -ve. இதுவும் கூட ஆன்டிஜென் தான். இதையும் கண்டறிந்தது கார்ல் லான்ஸ்டெயினர் தான். 1937 ஆம் வருடம், Rh காரணி பற்றி அவர் கூறியது 1940 ஆம் வருடம் ஏற்றுக்கொள்ளப் பட்டது. 

யார் UNIVERSAL DONOR? UNIVERSAL ACCEPTOR?

பொதுவாக, O வகை இரத்தம் உள்ளவர்கள் யாருக்கு வேண்டுமானாலும் இரத்தம் கொடுக்கலாம் என்ற ஒரு கருத்து உள்ளது. ஆனால், O+ உள்ளவர்கள் Rh -ve உள்ளவர்களுக்கு இரத்தம் தர முடியாது. மாறாக, O- உள்ளவர்கள் யாருக்கு வேண்டுமானாலும் இரத்தம் தர முடியும். இதற்கு காரணம் எந்த ஆண்டிஜென்னும் அவர்தம் இரத்தத்தில் இல்லாமல் இருப்பதே. இதே போல், AB+ வகை இரத்தம் யாரிடம் வேண்டுமானாலும் இரத்தம் வாங்கலாம். இதற்குக் காரணம் இவர்கள் இரத்தத்தில் எல்லா ஆன்டிஜென்களும் இருப்பதே. 

யாருக்குத் தரலாம்? யாரிடம் பெறலாம்? 

சில குறிப்புகள்:

1. சரியான எடையும் நல்ல ஆரோக்கியம் உள்ள யாரும் இரத்த தானம் செய்யலாம்.
2. ஒரு முறை இரத்ததானம் செய்தவர் குறைந்தபட்சம் ஆறு மாதம் கழித்து ரத்ததானம் தருவது நல்லது. 
3. இரத்தம் கொடுப்பதினால் நம் உடலில் இரத்தம் குறைந்து விடுவதில்லை. 24 முதல் 48 மணி நேரத்தில் மீண்டும் இரத்தம் சுரந்து விடும்.
4. இரத்த அழுத்தம், நீரிழுவு நோய் உள்ளவர்கள் இரத்த தானம் தருவதைத் தவிர்ப்பது நல்லது.
5. ஒருவரிடம் சராசரியாக, 1 யூனிட் (350மிலி) இரத்தம் மட்டுமே எடுக்கப்படும். 
6. எடுக்கப்படும் இரத்தத்தின் சேமிப்பு காலம் 42 நாட்கள் மட்டுமே. அதற்குள் அந்த இரத்தம் பயன்படுத்தப்பட வேண்டும். 
7. இரத்ததானம் செய்வதற்குப் பயப்படவோ, பதற்றப்படவோ தேவையில்லை. இது முழுதும் பாதுகாப்பானது... ஒருவிதத்தில் உடல் ஆரோக்கியத்துக்கும் நல்லதே.

இன்னமும், சில இடங்களில் தேவையான இரத்தம் கிடைக்காமல் உயிர்கள் போய்க் கொண்டுதானிருக்கின்றன. இந்தப் பதிவின் மூலம், யாரேனும் ஒருவராவது ஒரு முறையேனும் இரத்த தானம் செய்ய முன்வந்தால் அதுவே என் வெற்றி எனக் கருதுவேன். 

 இரத்த தானம் செய்வோம்... 

மனிதம் காப்போம்...