எங்கே சென்று கொண்டிருக்கிறோம்? - Where are we heading?

எங்கே போய்க் கொண்டிருக்கிறது நாடு...? எங்கேத் தோற்றுப் போகிறோம் நாம்...? ஜோதி சிங், ஜெஸிகா லால், நந்தினி, ஹாசினி போல் தெரிந்தவை குறைவு. குற்றம் செய்தவனைத் தண்டிக்க கோஷம் போடும் நாம் - மத்தியக் கிழக்கு நாடுகள் போல் அதிகபட்ச தண்டனை வேண்டும் எனக் கொதிக்கும் நாம் - குற்றங்கள் நடைபெறாமல் இருக்க என்ன செய்ய போகிறோம்?

தண்டனைகள் பயத்தை உருவாக்கலாம். விழிப்புணர்வை உருவாக்குமா? மனமாற்றத்தை உருவாக்குமா? குழந்தைகளை - பெண்களை போகப் பொருளாய் பார்க்கும் மனநோய் சரியாகுமா?

• ஆண் குழந்தைக்கும் ஒழுக்கத்தை சொல்லித் தருவோம். 
• பெண் குழந்தைக்கு வீரம் - தற்காப்பு சொல்லித் தருவோம்.
• நல்ல தொடுதல், கெட்ட தொடுதல் குறித்து அனைத்து பாலருக்கும் சொல்லித் தருவோம்.
• முதலில் குழந்தைகளிடம் பேசுவோம். நிறைய பேசும் குழந்தைகள் திடீரென மௌனமானால் என்ன காரணம் எனக் கண்டறியுங்கள். என் பெற்றோரிடம் எது வேண்டுமானால் சொல்லலாம் என்ற எண்ணத்தை உருவாக்குங்கள். சந்தேகங்களை விளக்குங்கள்.
• அனைத்துக்கும் தொழில்நுட்பத்தையும், இணையத்தையும் குறை சொல்வது எளிது. ஆனால், இவை இல்லாத காலத்திலும் இவ்வகை கொடுமைகள் நிகழ்ந்து வந்தே உள்ளன. 
• மானம், மரியாதை, கௌரவம் என்று மறைக்கப்பட்டு வெளியே தெரியாத விஷயங்கள் எவ்வளவோ?
• கொலை செய்யப்பட்ட பெண்ணை பெற்றோர் சரியாக வளர்க்கவில்லை எனக்கூறும் சமுதாயத்தில் தான் நாம் வாழ்ந்துக் கொண்டிருக்கிறோம்.
• ஆணுக்கும் பெண்ணுக்கும் வளர்ப்பு முறையில் - சமூக அடுக்குகளில் வேற்றுமையை வைத்து விட்டு, சமூக வலைத்தளத்தில் கண்ணீர் விட்டு என்ன பயன்?
• கட்டுப்பாடு எனும் பெயரில் வீட்டில் பூட்டி வைக்க வேண்டாம். அவர்கள் மனதில் வீரமும் தைரியமும், கையில் சிறுகத்தியும் கொடுத்தனுப்புங்கள். அங்கே அறுந்து விழும் காமுகர்களின் குறிகள்...!

இது எழுதிக் கொண்டிருக்கும் வேளையில், ஹாசினியின் தாய்க்கு மனநல ஆலோசனை (counseling) தர விருப்பம் தெரிவித்துள்ளார் மருத்துவர் ஷாலினி. அவர்களுக்கு வாழ்த்துக்களும் நன்றியும்.

அதே நேரம், சில நாட்களுக்கு முன், உத்திரப் பிரதேசம் சோன்பத்ரா மாவட்டம் அன்பரா மின் நிலையத்தின் நிர்வாகம் நடத்தி வரும் பெண்கள் பள்ளியின் தலைமை ஆசிரியர் 'மீனா சிங்' வீட்டுப்பாடம் செய்து வராத எட்டாம் வகுப்பு மாணவிகளை அரை நிர்வாணமாக்கி 2 மணி நேரம் மைதானத்தில் நடக்க விட்டுள்ளார். அதை வீடியோ எடுத்து, இனி வீட்டுப்பாடம் செய்யாவிட்டால், வீடியோவை இணையத்தில் பதிவேற்றுவேன் என்றும் கூறியுள்ளார். 

மாணவிகளின் பெற்றோர் புகாரின் பேரில், தற்போது  இடைக்காலப் பணிநீக்கம் செய்யப்பட்டுள்ள தலைமை ஆசிரியரை என்ன செய்யலாம்?

சொல்லப்பட்டவை அனைத்தும்

உள்ளக் குமுறல்களே...!

ஒழுக்கம் என்பதை இருபாலருக்கும்

பொதுவில் வைப்போம்...!

- கணபதிராமன்.

பாதகம் செய்பவரைக் கண்டால்நீ

பயம் கொள்ளலாகாது பாப்பா

மோதி மிதித்துவிடு பாப்பா அவர்

முகத்தில் உமிழ்ந்துவிடு பாப்பா

- பாரதி