செல்லாத்தா பள்ளியும் பெற்றோரின் போராட்டமும் - sellatha schools and Protest of Parents

Disclaimer நிலைவிளக்கம் : இந்தப் பதிவில் வரும் கதாபாத்திரங்கள் கற்பனையே... அதையும் மீறி சில கல்வி நிறுவனத்துடன் தொடர்பு படுத்தி யூகம் செய்தால் உங்கள் யூகம் சரியாகவும் இருக்கலாம் என்றுக் கூறிக் கொள்கிறேன்.

- கணபதிராமன்

அண்ணன்: என்ன தம்பி, நல்லா இருக்கியா? பாத்து ரொம்ப நாள் ஆகுது? என்ன விஷயம்...?

தம்பி: நல்லா இருக்கேன் அண்ணே... ஒரு விஷயம் சொல்லணும்... 

அண்ணன் : என்ன சொல்லுப்பா... தெரிஞ்சுக்குவோம்...

தம்பி: இந்த செல்லாத்தா ஸ்கூல் இருக்கு தெரியுமா? 

அண்ணன் : வருஷா வருஷம் மூணு ரேங்குக்குள்ளே வருமே அந்த ஸ்கூல் தானே... தெரியுமே...! சென்னையில மட்டும் எப்படியும் 20 ஸ்கூல் இருக்குதுன்னு நினைக்கிறேன்.

தம்பி: ஆமா, ஏரியாக்கு ஒண்ணுன்னு கட்டிருக்காய்ங்க... போன வருஷம் தொடங்குன மேடவாக்கம் பிரான்ச்ல மூணு நாளுக்கு முன்னாடி பேரண்ட்ஸ் எல்லாம் சேர்ந்து போராட்டம் நடத்தி இருக்காங்க...

அண்ணன்: என்னய்யா போராட்டம்.... எதுக்கெடுத்தாலும் போராட்டமா, தம்பி?

தம்பி: என்னண்ணே... புரியாம பேசிக்கிட்டு... முன்னாடி சென்னையில நாலு ஸ்கூல் வச்சிருந்தவங்க ஏரியாக்கு ஒண்ணு கட்டிருக்காங்க... ஆனா சொன்ன மாதிரி வசதி பண்ணித் தரணும் இல்லயா? பெத்தவங்க கிட்ட பொய் சொல்லி ஃபீஸ் வாங்கிட்டு ஒரு வசதியும் செய்யாம ஏமாத்துனதால தான் போராட்டமே...

அண்ணன்: சரி, போராட்டம் பண்ணுனவங்களோட கோரிக்கை தான் என்ன?

தம்பி: 

1. ஏசி வகுப்பறை, அதிநவீன விளையாட்டரங்கம்னு பொய் சொல்லி போன வருஷம் வாங்குன ஃபீஸ் திருப்பிக் கொடு.

2. போன வருஷம் கொடுத்த ஃபீஸுக்கே வசதி செய்து தரல... இந்த வருஷம் 30000 ஃபீஸ் அதிகம் பண்ணி இருக்கீங்க... அதை ஏத்துக்க முடியாது... கட்டணம் அதிகமாக்குனத குறைக்கணும்.

3. ஏடிஎம் கார்டு / கிரெடிட் கார்ட் / ஆன்லைன் பேமெண்ட் அக்செப்ட் பண்ணு. 

இதுல மூணாவது காரணம் தான் அழகு... அதுக்கு பேரண்ட்ஸ் சொன்ன விளக்கம், ஏன் நாங்க மட்டும் பேங்க்ல லைன்ல நின்னு கஷ்டப்படணும். நீங்க ஆடிட்டர் வச்சு பொய் கணக்கு எழுதுவீங்களா? நீங்க எவ்ளோ ஃபீஸ் வாங்குறீங்கன்னு எல்லாத்துக்கும் தெரியட்டும். 

அண்ணன்: பள்ளி நிர்வாகம் எல்லாத்துக்கும் ஒத்துக்கிச்சா? 

தம்பி: முதல்ல பேரண்ட்ஸ கன்வின்ஸ் பண்ண முயற்சி பண்ணுனாங்க... நாங்க வருடா வருடம் ஆசிரியர்களுக்கு சம்பள உயர்வு தர வேண்டி இருக்கு. அதனால தான் ஃபீஸ் உயர்த்த வேண்டி இருக்குன்னு காரணம் சொல்லுச்சு, நிர்வாகம்.

அண்ணன்: காரணம் சரி தானே தம்பி?

தம்பி: உங்களுக்கு இப்படி சொன்னாப் புரியாது... ஒரு கணக்கு சொல்றேன். 30 மாணவர்களுக்கு ஒரு டீச்சர்னு வச்சுக்குவோம். மாதச் சம்பள உயர்வு ₹700, சரி ₹1000 வச்சுக்கலாம். வருஷத்துக்கு ₹12000. ஒரு மாணவனோட கட்டண உயர்வு ₹30000. 30 மாணவனுக்கு ₹9 லட்சம்.  இது உயர்வு மட்டும் தான்... அதுவும் 30 மாணவர்களுக்கு மட்டும் தான். ₹12000க்கு ₹9 லட்சம் வாங்குறது சரியா? சொல்லுங்கண்ணே...

அண்ணன்: ஆமாய்யா... தப்பு தான். ஆமா? வெறும் ₹700 தான் இன்கிரிமெண்டா? நம்புற மாதிரி இல்லயே... 

தம்பி: அட நீங்க வேற... சில ஆசிரியர்களுக்கு நாலு வருஷத்துக்கு ஒரு முறை தான் இன்கிரிமெண்டே...

அண்ணன்: கடைசியில என்ன ஆச்சு? பேரண்ட்ஸோட கோரிக்கை நிறைவேறுச்சா?

தம்பி: பள்ளியோட டீன் கோரிக்கைகள் ஏத்துக்கிட்டோம், கண்டிப்பா நிறைவேத்துவோம்னு கையெழுத்து வாங்கிருக்காங்கன்னு கேள்விப்பட்டேன்... ஆனா, அது அந்த பிரான்சுக்கு மட்டும் தானாம்... மத்த பிரான்ச் ஸ்கூல்ல தெரியாத அளவுக்கு மீடியால நியூஸ் வராம தடுத்துட்டாங்க.... பாலிமர் நியூஸ்ல மட்டும் வந்துதுன்னு நினைக்கிறேன். 

1/2/2017 அன்று நடந்த பெற்றோர்களின் போராட்டம் (படம்: பாலிமர் நியூஸ்)

அண்ணன்: செய்தி வெளில தெரிஞ்சா எல்லா ஸ்கூல்லயும் போராட்டம் பண்ண ஆரம்பிச்சுடுவாங்கன்னு பயமா இருக்கும். 

தம்பி: இன்னும் நிறைய இருக்குண்ணே... விடுமுறை நாளுல சனி ஞாயிறுல ஆசிரியர்கள் வீடு வீடாப் போயி உங்க குழந்தைகளை எங்கப் பள்ளியில சேக்கணும்னு சொல்ல வைக்குறது, ஒவ்வொரு ஆசிரியரும் 10 குழந்தைய அட்மிஷன் சேத்து விடணும்னு சொல்றது இப்படி நிறைய டார்ச்சர் டீச்சர்களுக்கும்....

அண்ணன்: இவ்ளோ தெரிஞ்சு வச்சிருக்கியே... எப்படி தம்பி?

தம்பி: காத்துக்கும் காது இருக்குண்ணே... ஆனா நான் சொன்னது எல்லாம் உண்மை...

அண்ணன்: என்ன தம்பி பண்றது? கல்வியும் மருத்துவமும் இப்படியே போயிக்கிட்டு இருந்தா நாடு என்ன ஆகுறது? அடித்தட்டு மனுஷனுக்கு இதெல்லாம் கிடைக்கவே கூடாதுன்னு தான் எல்லாம் நடக்குது...

தம்பி: தப்பு நம்ம கிட்டயும் இருக்குண்ணே... CBSE, English மீடியம் தான் நல்லதுன்னு அது படிச்சா தான் வேலை கிடைக்கும்னு நம்பிக்கிட்டு தான் பசங்கள இந்த மாதிரி பள்ளிகளுக்கு அனுப்புறோம். பள்ளி கட்டண உச்ச வரம்பு பத்தி தெரிஞ்சு வச்சிருக்கோமா? அதிக கட்டணம் வாங்குனா ஏன்னு கேட்டிருக்கோமா? இப்பத்தான் ஒரு பள்ளியில கேட்டிருக்காங்க... தொடர்ந்து கேட்போம்... சரியா, அண்ணே...?