ஒதுக்கீடு - Reservation

சுயநிலை விளக்கம்: யார் மனதையும் புண்படுத்தும் நோக்கில் இந்தப் பதிவு எழுதப்பட்டது அல்ல... அவ்வாறு புண்பட்டால் பல்லாயிரம் ஆண்டுகளாக செய்த கொடுமையின் குற்ற உணர்ச்சியாக இருக்குமே தவிர, இந்தப் பதிவினால் இருக்காது.

நம் நாட்டின் விடுதலைப் போராட்டத்திற்கு வித்திட்டவன் மங்கள் பாண்டே எனவும் அவனே 1857 சிப்பாய் கலகத்துக்குக் காரணம் எனவும் பாடப் புத்தகத்தில் படித்த நியாபகம்... உண்மை அதுவல்ல... கங்கையில் குளித்து விட்டு கரையேறிக் கொண்டிருந்த பாண்டேயின் மீது மோத வந்த ஒரு தலித் சிறுவனைக் கடிந்து "நீ தொட்டால் தீட்டு... மீண்டும் குளிக்க வேண்டும்..." என்றான் பாண்டே... பதிலாய் அந்த சிறுவன் கேட்ட கேள்வியே நம் விடுதலைக்கு வித்திட்டது...

அந்த சிறுவன் கேட்டான் 
"மாட்டுக் கொழுப்பு தடவிய தோட்டாவினை வாயால் கடித்து துப்பாக்கியில் பயன்படுத்தும் நீ, பிராமணனா? நான் தொட்டால் தீட்டா?"
இந்தக் கேள்வியால் பாண்டேயினுள் எழுந்த சாதிப்பற்றினால் தான் சிப்பாய் கலகம் துவங்கியது. எப்படியோ, இந்திய விடுதலைக்கு வித்திட்ட அந்த முகம் தெரியாத சிறுவனுக்கு இந்தப் பதிவினை சமர்ப்பிக்கிறேன்.

ஒதுக்கீடு

இட ஒதுக்கீட்டினாலே நாடு
முன்னேறாமல் போனது என
முட்டாள்தனமாக பேசுவார்
அவர் மட்டுமல்லாமல்,
இட ஒதுக்கீட்டால் படித்தவர்
மனத்தில் இதைக் கூறி
குற்ற உணர்ச்சியை விதைப்பார்...

வேதம் ஓத ஒரு சாதி...
நாட்டை ஆள சில சாதி...
வணிகம் செய்ய சில சாதி...
இவர் மூவர்க்கும் பணிந்து செல்ல சில சாதி...
என பிரித்து வைத்து இடஒதுக்கீட்டை
மதத்தின் பேரால் துவங்கி
வைத்தோம்.

நான்கிலும் சேராத சிலரை
மனிதனாய் கூட மதியாமல்
ஆயிரமாயிரம் ஆண்டுகளாய்
அடிமையாய் நடத்தினோம்.

அடிமையாய் இருந்தவனுக்கு
அரசு வேலையா?
குறைந்த கட்டணத்தில் படிப்பா?
நாடு எப்படி முன்னேறும்?
இப்படி அங்கலாய்க்கிறோம்...

ஊருக்குள் வாடகைக்கு வீடு விடும்போது கூட
சாதி கேட்டு வீடு தரும் கேடு கெட்ட நாடு
சொல்கிறது இட ஒதுக்கீடு வேண்டாம் என...

இங்கு எனக்கு கிடைக்கலையே என
வேதனை படுபவனை விட,
அவனுக்கு கிடைக்குதே என
அழுபவன் தான் அதிகம்....

அன்றும் இன்றும் இட ஒதுக்கீடு இல்லாத
இரு வேலைகள்....
மணி அடிக்கும் வேலை
மலம் அள்ளுபவனுக்கு கிடைத்தால்
இங்கே சாதிக் கொடுமை
ஏதும் இல்லை எனக் கூறலாம்.

ஆயிரம் ஆண்டுகள் அடிமையாய் இருந்தவன்
சொல்லட்டும் இனி எனக்கு
இட ஒதுக்கீடு வேண்டாம் என...
இல்லையேல் ஒரு ஆயிரம் ஆண்டுகளாவது
பொறுத்திருங்கள்....

இத்தனை காலம் ஒதுக்கி வைக்கப்பட்டவன்
ஒதுக்கீட்டினால் உங்கள் தோளுடன் தோள்
உரசினால் பெருமை கொள்ளுங்கள்
உலகின் உன்னத மனித இனம் நாம் என...

மாறாக பொறாமை கொண்டால்
ஒரு செல் உயிரி கூட
உங்களைக் கேவலமாய் காணும்...

- கணபதிராமன்

Comments

Post a Comment

Popular posts from this blog

அகர முதல - சிறுகதை (திருக்குறள் கதை) குறள் 0001

Image
இன்று வாழ்வின் எல்லா நாளையும் போல கடத்தி விடலாம் என்றே நினைத்திருந்தேன். ஆனால், காலையில் எழுந்ததில் இருந்தே, என்னையே அறியாமல் ஒரு இனம்புரியா உணர்வு என்னை ஆட்கொண்டிருந்தது. நான் தமிழ்ச்செல்வன்... என்னோட அப்பா அம்மா எப்படி இந்த பெயர் வைத்தார்கள்... அவர்களுக்கு நான் என்னவாக வருவேன் என நான் பிறக்கும் போதே தெரிந்திருந்ததா...?? "தமிழ், காபி... ஒரு அஞ்சு நிமிசத்துல இட்லி ரெடி ஆயிடும்..." என்று என்னோட கையில காபி குவளையைக் கொடுத்துட்டுப் போகிறாளே...? இவள் தான் வளர்மதி. என் மனைவி. என்னை முழுதும் புரிந்தவள். கையில் கொடுத்திருந்த காபியின் சூடு, ஆவியாக காற்றில் கரைந்து கொண்டிருக்க, நான் ஆவிக்கும், காற்றுக்கும் இடையே ஆன ஏதோ ஒரு புள்ளியில் நோக்கியபடி, அப்படியே அமர்ந்திருந்தேன். சிறிது நேரத்தில் உள்ளே இருந்து "இட்லி ரெடி..." என்று வந்தவள், கையில் அப்படியே இருந்த காபியையும், சிலை போல் அமர்ந்திருந்த என்னையும் பார்த்து, அருகில் வந்து என் கையருகே நின்று, "தமிழ்..." என்று கைகளைப் பிடித்தாள்.  "சொல்லும்மா..." என்றேன், எங்கோ இருந்த நினைவின் கயிறு அறுந்தவனாக....
Read more

புறநானூறு பேசும் நீர் மேலாண்மை

Image
சுழன்றும் ஏர் பின்னது உலகம் உழன்றும் உழவே தலை              - திருக்குறள்   பாடப்பட்ட காலத்திற்கு மட்டுமல்லாமல் இன்றைக்கும் என்றைக்கும் ஒன்றிப் போகும் சில செய்யுள்கள் - பாடல்கள் பாடப்புத்தகத்தில் மட்டுமல்லாது வாழ்வின் பாடமாகவும் மாறிப் போவது நாம் அறிந்ததே. அவ்வகைப் பாடல்களில் ஒன்று தான் இன்றையப் பதிவாக.  புறநானூறு - பாடல் எண் - ௧௮ (18) பாடியவர் : குடப்புலவியனார்  பாடப்பட்டோன்:  பாண்டியன் தலையாலங்கானத்துச் செருவென்ற நெடுஞ்செழியன்   திணை: பொதுவியல் துறை: முதுமொழிக் காஞ்சி, பொருண்மொழிக் காஞ்சி  பாடல் பாடப்பட்ட காலத்தில் வான்மழைப் பொய்த்து வேளாண்மை நொடிந்து போனக் காலம். இந்தக் காலக்கட்டத்தில் மன்னனுக்கு அறிவுரை கூறுவதாக அமைந்துள்ள பாடல். (இந்தக் காலத்திற்கும் ஏற்ற பாடலாக அமைவதில் வியப்பொன்றும் இல்லை...!)  கடல் சூழ்ந்த நாட்டை ஆளும் மன்னா... எனப் புகழும் புலவர், மன்னனின் கோட்டை அகழி பெரிதாய் இருந்தாலும், நீரின்றி இருப்பதைச் சுட்டிக் காட்டுகிறார்...  இறந்த பின் சேர்க்க வேண...
Read more

தமிழாய்வர் சீனி வேங்கடசாமி - Mayilai Seeni Venkatasami - A Tamil Researcher

Image
மயிலை சீனி வேங்கடசாமி தமிழாலே ஒன்னாணோம்னு சொல்லிக் கொள்ளும் நாம் முன்னால் நம் வரலாற்றினைச் சரியாகத் தரவுகளுடன் புரிந்து கொண்டுள்ளோமா? தரவுகள் இல்லாமல், சாதீயம், பரம்பரை, மதம் எனப் பலப்பிரிவுகளால் பிரிந்து - ஒருதலைப்பட்சமாக வரலாற்றைத் திரித்து வைத்திருந்த வேளையில், தரவுத்தேடி - நாடு முழுதும் சென்று - களப்பணியாற்றி - ஆய்ந்து - பல ஆய்வுக்கட்டுரைகள், புத்தகங்கள் மூலம், தமிழின் தொன்மையை உலகுக்கு - ஏன் தமிழருக்கே காட்டிய மயிலை சீனி வேங்கடசாமியின் 117 வது பிறந்தநாள் இன்று... மயிலை சீனி வேங்கடசாமி (16.12.1900 - 8.5.1980) டிசம்பர் 16, 1900 அன்று மயிலை சீனிவாசன் எனும் சித்த வைத்தியர்க்கு மூன்றாம் மகனாகப் பிறந்தார், வேங்கடசாமி. முதல் அண்ணன் தந்தையைப் போல் சித்த மருத்துவத்தில் நாட்டம் கொள்ள, இரண்டாம் அண்ணன் கோவிந்தராசனோ, தமிழ்ப்பற்று கொண்டு கவியெழுதலானார். திருக்குறளின் காமத்துப்பாலின் 250 குறள்தனை நாடகவடிவாய் எழுதினார். மேலும், மயிலை நான்மணிமாலை எனும் நூலையும் எழுதியுள்ளார். அண்ணனின் தமிழ் எழுத்துக்களைப் படிக்கத் துவங்கிய வேங்கடசாமிக்கும் தமிழின் தொன்மையான அனைத்தையும் தேடிப்படிக்க எண்ணம்...
Read more